آراء في الجلي

[المحامية علا خدام الجامع]

في لقاء ضم مجموعة من الشبان المتزوجين افتتح أحدهم الحديث عن الجَـلي مازحاً فكانت ردود أفعال الجالسين مختلفة:

"إن كنت أريد من زوجتي شيئاً ، لابأس بالجلي

" زوج وصولي

- "إن الجلي وسيلة لكسب مودة الزوجة إن مارسته مرة أو اثنتين بالشهر
زوج دبلوماسي

- "اقف معها في المطبخ وأجلي كما تجلي زوجتي ، نحن سواسية"

زوج تقدمي

- "شو جلي وماجلي، عليّ ما عليّ .. مابعرف شكله للمطبخ
" زوج تجبره زوجته أن يجلي كل يوم

"إن كانت زوجتي متعبة ، زوجتي الثانية تجلي، وإن كانتا مريضتين أتزوج ثالثة" زوج ملتزم دينياً على طريقته

- "كل البيت يجب أن يجلي بدوره
زوج شيوعي

- "أنا أجلي عند جارتنا بس، لا أجلي بالبيت
" زوج عميل

- "الجلي مسألة لا أدير لها بالاً ، الصواب أن تعرف الزمان والموقف المناسبين للجلي
زوج حكيم

- "في اللحظة التي أجد زوجتي على وشك التذمر من الجلي أجلب لها هدية
زوج ذكي

- "إن طالبتني زوجتي بأن أجلي ، ألقي بها خطاباً حول خطورة المرحلة التي تمر بها الأسرة"
زوج يعمل كمسؤول عربي

- "لقد دفعت لها مهرها وانتهيت ، عليها أن تقوم بما يجب عليها القيام به"
زوج رأسمالي


- "إن النظام السوري وراء تململ الزوجات من الجلي
" زوج من جماعة 14 آذار

- "ليش مو المفروض أن الزوجين يلعبوا طرة ولا نقش عن كل مرة يأتي فيها موعد الجلي؟"
زوج حمصي

- "نحنا عنا جلاية وفلبينية
" زوج برجوازي

- "نحنا من زمان اشترينا صحون وكؤوس كرتون حلاً للمسأل
" زوج براغماتي

- "أنا فجرت المطبخ السنة الماضية"
زوج من جماعة أبو مصعب الجلاوي

- "زوجتي مابيهون عليها تشوفني واقف عالمجلى

"زوجكذاب

- "لا مشكلة عندي إن كان سائل الجلي برائحة الورد او الياسمين"
زوج رومانسي

[عاش بعث العرب]

المشكلة أنوا أنا يلي بجلي كل جلي بالبيت ... و دائما ...... لأ ... واذا بدكن ... بكوي كمان
ورجاء ما حدا يروح مخو لبعيد .... انا ولا واحد من يلي انذكروا من قبل
انا رجل
عازب

الله يساعد المتزوجين

[أحمد الزرابيلي]

على الأقل يا أستاذنا الكريم عم تجلي بدون أي ضغط أو اكراه

و مالك بحاجه لترضي حدا

على كل حال لا تفرح كتير لأنو هي المرحلة بدها تنتهي و رح نفرح فيك و تتجوز

و أكيد
أكيد
رح ينطبق عليك واحد من الجللايين الذين ذكرتهم بتول المنتدى

و يمكن


اذا مو أكيد

أو مثلاً

أو ربما


تكون هاد

اقتباس: "إن طالبتني زوجتي بأن أجلي ، ألقي بها خطاباً حول خطورة المرحلة التي تمر بها الأسرة"

اقتباس: زوج يعمل كمسؤول عربي

[عاش بعث العرب]

الأستاذ أحمد الزرابيلي المحترم

بدون تردد اسمحلي قلك : ....... ملعوبة يا معلم

ومن شدة استساغتي لفكرة أن أكون مسؤولاً عربياً

أغمضت عينيَّ ... !!! ... متأملاً ومتخيلاً نفسي في ذلك الموقع ، ولكن بدلاً من ذلك ... رأيت أنني .... ؟؟؟؟ ...

متزوج بإمرأة درويشة ... وطقموشة .... وعسولة .. بتشبه . ؟؟؟؟... مممم .... مين بدي قلك ... أيوه .... ( كلينت إيستوود ) الممثلة البرازيلية المشهورة أكيد عرفتوها

كانت واقفة ( أفى ) المجلى بالمطبخ .. ويا حرااام .. مو قدرانه تسند طولها من كتر مو هلكانة من شغل البيت يلي ما عم يخلص ، رغم انو هيي كل يوم بتعملوا تنضيفة وتعزيله نظامية .؟. وذلك بسبب الغبرة المتراكمة وكأن لها دهراًَ ، والناتجة عن حركة سيارات الشحن المحملة بالرمل والبلوك والاسمنت المهرب إلى إحدى مناطق المخالفات

..إنوا يعني اتخيل ... تهريب ضمن المدينة وليس على حاجز جمركي ... وشو عم يهربوا ... مو حشيشة أو ماظوووت ؟؟؟ لأ سيدي عم يهربوا بلوك ورمل ... طبعا أتخيلت مرتي عم تعاني من هالمشكلة لانوا نحنا رح نكون ساكنين بمنطقة سكن عشوائي عليها حواجز أكتر من الحواجز يلي ما قدرت ترد مياه سد زيزون اللي فرط من نكتة حمصية حكاها واحد محشش طرطوسي طالع زيارة على حماة لما كان ( مارء ) هوو وصاحبوا الحلبي قريب من جسم السد ( من غير اليوم ) ....وطبعا كنا ساكنين بغرفة مليسه وكيسه وما بتخرق مي ... واجرتها عشرين ألف ليرة بالشهر ... طبعا مع المنافع ... يا بلاش .... ولغيري والله ما كانت بتروح بأقل من ( واحو عشرين ) الف ليرة ... هيك قلي صاحب الغرفة يلي أجرني ياها

منرجع للمرأة الواقفة بمطرحها يلي هيي مرتي المفترضة أصولاً .. ويلي قالتلي بكل غنج ودلال متشبهةً بممثلات .. (شام يود) ... طبعا على غرار (هووول يووود) و (بووول يووود) وكل مراكز اليووود الصخري والبحري الموجودة على امتداد البقعة العربية وغير العربية من المحيط إلى المحيط التاني : ( حياتي .. والله تعبانة .. تكفّني .. تقبش عضامي .. قوم كمل هالصحنين جلي عني ... الله يسترك )

وفي تلك اللحظة بالذات وبينما كاسة المتة من أمامي ويلي مالصة من ساعة وما إلي حيل لقوم بدلها او ارفعها للمجلى يلي بيفصل بيني وبينوا باب .. لشيء طول بعرض بيطلع مترين .. أسميناه أنا و جوزتي المصون المفترضة (مطبخ ) .. وعن جانبي جهاز الرائي أي ال (تي في ) يلي ألوانو بتاخد وبتعطي متل اب لطفي ... يعني مرة بيشعل ومرات بيطفي ... على هوى التوتر العالي او الوااااااطي ... يلي عم يتفضلوا على راسنا فيه من وزارة الكهرباء وفلاسفتها ومبدعيها واللي الله يعطيهن العافية ... قدروا بدل ما ينزلوا الفاقد من الشبكة رفعوه لاكتر من تلت المصروف العام للدولة.. شلون .. ؟؟؟ !!!!! .... بدك منجم ابن كر عفوا ( ابن كار ) لحتى ينجملك ويفسرلك يلي ممكن يقدر يفسروا

المهم مع ما ذكرناه من وضعنا السابق ، كانت بوقتها عيوني متسمرة على مشهد أكشن طالع على القناة الارضية بيكون فيه السوبر ستار رامبو القتلة والسفاحين المجرم اولمرت الابله ربع صحيان وتلات أرباع نايم وعم يكبي ويهز لورى وقدام متل القنزوح ( القنزوح تعني الحردون ) وهوو مهرتك من التعب بعد أن انجز اهم بطولاته في ذبح اطفال غزة ، يلي لهلأ ما حدا إلتكش فيهن من أبناء مرضعاتهن وفق المعتقد القومي المصري الذي ارتأى بناء جدار فولاذي ليمنع تسونامي الرمال السينائية من التقدم المترافق بالدعم الارهابي لجماعة رجال الله يوم الفتح في لبنان وشركائهم في إذلال الصهاينة احباب الزعامة المصرية من الجماعة المارقة في حرب الفرقان بغزة والمتشكلة من الحمساويون ومن لف لفيفهم من المغامرين يلي لهلأ البرجوازية العربية عم تلعن ابو الصهاينة يلي ما (غدروا) يقضوا عليهن ويريحهوهن منهن

طلبها نزعلي مراقي ، وتجمدت .. بإيدي حبة البزر دوار الشمس .. التي كنت قد انهيت فصفصتها تواا ، ... ، وانتبهولي على تواا

ومع احساسي بعدم المبالاة وقلة الادراك الذي تظهربه جوزتي العسولة والطقموشة المغلوب على امرها وعدم تفهمها لمواهبي المهدورة من الاخرين في التصدي لكل ممارسات الامبريالية العالمية المعادية للشعوب المستعبدة وسعيها الدؤوب للقضاء على النظم الاشتراكية وحركات التحرر الوطني في كل أصقاع البسيطة ، ... !!!! ... ، ابتلعت ريقي ونظرت اليها شذرا ... ولا حدا يسأل شو يعني شذرا .. وهيي يا حرام ... احست بأنها ارتكبت غلطها القاتل المعتاد .. وكأن غضب التاريخ قبل غضب الله قد نزل عليها وقلت لها بكل حزم وبمجموعة من الكلمات التي شابهت في سرعة قذفها وخياليتها سرعة وخيالية أحداث الموفيت ( الفيلم ) يلي ندفتوا من يومين من عند رفيقي ... ويلي قالوا انوا أرباحوا العالمية قاربت مبلغ يقدر بحوالي المليار( دووورار ) يلي اسموا افاتار .. او .. افا ايدي .. او .. أفا باب الصئاء ... أو ... افا اجري ... حشا السامعين والقارئين ...

وقلت صارخاً : ( ولك شو قصتك انتي ، وين حسك الوطني .. وين شعور المسؤولية ... انعدم عندك الاندفاع والتقدمية ... بدك ياني قوم اجلي ، ........ انا رح قوم اجلي بس ... ! .. وين بتحطي حالك قدام خولة بنت الازور والنساء المناضلات في معارك الحياة .. وين أنتي من خولة يلي خاضت حروب طاحنة من اجل تحرير حبيبيها .... وللا الخنساء ... يلي ضحت بأربع شباب متل الوردة كرمال أخوها كليب ......... انتي بتعرفي انوا الليدي ديانا كانت تجلي صحونوا لدودي الفايد ... ولم تتذمر مرة واحدة ... بدك اجلي رح اجلي بس .. ! .. شو رح يكتب التاريخ عن الزوجة التي اهملت واجباتها كقائد للاسرة التي تخرج منها بعلك .. طبعا يلي هوو انا ... المرأة المدبر والمسير الرئيسي والاساسي الحقيقي لمركب الحياة بما فيه .. من .. جلي وكنس ومسح وكوي و أعمال اضافية مخصوم منها ساعات التأخر في الاستيقاظ الصباحي ، يا عيب الشووم عليك ... ولك .. !!!!!!!!!!!!! )

وقبل ما كمل كلامي .. قالتلي ... ودمعةٌ تترقرق في عينيها مشيرة إليَّ بيدها يلي حاملة فيها ليفة الجلي : ( بدلك كاسة المتة روحي ) .. وعلى الفور أجبتها وقد بدا الارتياح على محيَّاي ... بعد أن وضح لي أن جوزتي الغالية قد إستوعبت الخطاب السياسي يلي طرقتها ياه ... أي والله عمري .. وعالسريع خلصي جلي وتعي لنتابع برنامج ... ( الشرطة في خدمة الشعب ) ... لانوا رح يبلش ... و بالمرة قلبي صخني الأبريء بطريقك ... وافتحي هالشباك شوي ... في ريحة غريبة طلعت بالبيت ... أبصر .... في حدن من الجيران فات عملها ونسي يشد السيفون

وجلّسْتْ قعدتي ... وشكلست وضعي في الطراحة استعدادا لما هو آت

ولكن .................. !!!!!!!!!!!!!!!!

يا فرحة ماتمت

قفطتت متل المخبول ... بعد ان سمعت دجة قوية لمجموعة من الاشياء تتكسر وكأن المنزل سقط على رأسنا

هرعت الى المطبخ لأجد أخي الأصغر الله يخليلي ياه هوو والبقية الباقية من أهلي رحمهم الله ... قد أسقط رف الصحون بالكامل بما يحمله من كاسات وزبادي صيني .... والله لو انوا صيني ما انكسروا ... وصلت إليه وهو يقف في وسط مجزرة من الزجاج المكسر وقلت في هلع : لك شوو هااااااااااد

وفوجئت برده المزلزل الذي اخرسَّ الحس الثوري في داخلي

أي شو عملنا ... عم اجلي الكاسات واجيت لحطهن قام فرط الرف كلوا

أنا : لك مين قلك تجلي .... روح انقلع من وجهي

وانهمكت اتمتم في سري على كل من جاء في بالي ربما شتما وربما شتما .. و ألملم الزجاج المبعثر ... كنت في حالة لم يقطع استغراقي فيها سوى صوت شقيقتي الصغرى وهي تنادي عليي من أمام جهاز الحاسوب الذي نسيت أنني تركته يعمل بما عليه من كتابة كتبتها لتقول لي ضاحكة وهي تقرأ ما كنت قد ( دشرتوا ) مباحاً للقارئين ... لك أخي شو قصتك

هلأ خولة بنت الأزور راحت لتحرر حبيبها .... التاريخ بيقول انوا راحت تحرر أخوها ضرار

والخنساء ضحت بأولادها كرمال العروبة .... مو كرمال أخوها كليب .. يعني لمعلوماتك كليب أخو الزير سالم مو أخو الخنساء

بعدين الليدي ديانا كانت تجلي لددوي .... لك شو هالخرط هادا

و جوزتي .... بتنكتب ... زوجتي .... مو هيك ...

لك شو هالتخبيص ..... كلينت ايستوود .. زلمة ... ممثل أمريكي مو بنت مدري شو مواصفاتها

ومين هادا احمد الزرابيلي ............

لاأخفينكم أسقط في يدي من هول المفاجئة وكثرة التخبيص

وبحركةِ مَنّْ إرتكب معصيةً ... اندفعت الى جهاز الحاسوب كغول كاشر ( يعني مكشر عن نيابي ) ... وسحبت القابس الكهربائي من موضعه .... مخاطبا إياها : انتي مو كنتي رايحة تتفرجي على مراد علم دار كيف بدوا يهديها لرهف سيارة حمرا بعيد ( الهابي لاند ) ..... لك شو جابك لهوون ... دفعتها بعيدا عن الحاسوب الى خارج الغرفة .... وانا أقول في سري الله يسامحك يا استاذ احمد .... حدا بيدعي عالتاني بالزواج وبعدين لك شو بدك بهالقصة لحتى تتحركشني وانت بتعرف انوا أصابعي بيصيروا يحكوني للكتابة

لا حول ولا قوة الا بالله

أعتذر من القراء الكرام عن الاكمال .... مضطر سكر فورا لروح اقضي على حالة فلتان أمني نشبت في صالون البيت بين أخوتي الشباب عقب نزاع فكري ومراهنة فاشلة أطلقوها فيما بينهم ليثبت كلٍ منهم صوابية رأيه في رجحان كفة جورج بوش الأب على جورج بوش الابن أو العكس من حيث أحقية إعطاء ومنح أحد الوبشين شرف الحصول على لقب ( الأكثر حيونة ) .. الصفة التي تميزا بها في عهديهما

دمتم

( يتبع ) ....................

تحذير : ( حميع الحقوق محفوظة لمنتدى محامو سوريا )

[المحامي عارف الشعَّال]

عندما لعبها الأستاذ أحمد بدهاء قلت في نفسي لن يسكت عنها الأستاذ ثائر

و لكن كيف سيجيب .....

هل يكون الجواب عاصفاً ، وترجع الإثارة من جديد ؟؟

استبعدت ذلك لأن الأجواء ربيعية هذه الأيام كما لاحظنا من حالة الطقس .

إذن ماذا سيقول .. فلننتظر .

و عندما أتى الجواب الذي لم يتأخر ، بدأت أقر باهتمام ، و أقرأ ، و أقرأ ....

و عندما انتهيت بقيت حائراً في وصف هذا الجواب و تقييمه ...

و ارتحت أخيراً عندما اكتشفت أنني قرأت سيناريو حلقة تلفزيونية ممتعة عشت تفاصيلها حتى أنني أستطيع أن أتخيل تفاصيل المنزل الذي دارت أحداث هذه الحلقة بداخله ( اللوكيشن ) كما أعتقد ..

و رغم أن الجواب لم يكن عاصفاً لكنه كان مذهلاً ، و أتى بالإثارة مجدداً بطريقة أخرى غير متوقعة أو مألوفة .

في الحقيقة لا تقتصر فضائل هذا المنتدى على التعرف بزملاء و إخوة آخرين ، و إنما تمتد لتكشف عن زوايا و خصال في شخصيتهم لم تكن لتعرفها لو بقيت سنوات تقف معهم في أروقة القصر العدلي تتجاذب و إياهم أطراف الحديث .

بالمناسبة أستاذ ثائر

أجريت إحصائية لجوابك على الوورد و كانت النتيجة أنه مكون من :

1459 كلمة
6222 حرف
170 سطر
36 فقرة
6 صفحات
قرأته كاملاً دون أن أشعر بالملل .


مع خالص التحية و الاحترام

[عاش بعث العرب]

بسم الله الرحمن الرحيم
أخرست قلمي أيها الموقر
وليس لي فيما تكرمت به من إطراء ، سوى الحمد الوفير والثناء الجليل لله العزيز الحميد على نعمه التي فتح بها خيره وعلمه على عقول عباده ، الضعفاء أمام قدرته ، المفتقرين لرحمته ، و أشهد أنني عبده الذليل المستكين المستجير المقر المزعن لربوبيته
لك مني جزيل الشكر و وافر التقدير لكل جهد بذلته في رسم حروف المودة عند ردك الرائع على مشاركتي
اذا كان الكلام من فضة فالسكوت من ذهب
ولكن ، هنالك رجال اذا كان سكوتهم من ذهب فكلامه من ياقوت وزبرجد باهر
للمرة الثانية أرجو الله ان اكون عند حسن الظن
وتقبلوا خالص الاحترام

[حمزة الصوص]

في كل مرة أجد فيها اسم الأستاذ أحمد في أي مشاركة بهذا المنتدى أدخل لأقراها للفائدة والمتعة المتوافرة دوما في مشاركاته و ليقيني وعلمي بوجود رد عاصف من الأستاذ ثائر الذي له من اسمه نصيب كبير واستمتع بالحكمة التي تصدر من الاستاذ الوقور عارف فلهم مني جميعا كل تقدير واحترام

الزمان صيف عام 2020
المشهد الأول :
سيارة فارهة سوداء اللون تحمل شعار السادة أعضاء مجلس الشعب تسير في منطقة المزة تتجه الى شارع فلافل على كيفك و تتجاوز الحاجز الأمني للدخول الى حي 86 ببطء و يقوم عناصر الأمن بضرب تحية للسيد المسؤول
المشهد الثاني
تقف السيارة أمام أحد الأبنية الجديدة بالحي ( الحي معروف بأن قاطنيه من المسؤولين أو أقارب المسؤولين أو معارف المسؤولين أو المدعومين ) و يترجل منها المسؤول أبو يعرب متثاقلا رافعا قدمه من السيارة ليظهر واضحا شعار صنع من جلد الغزال على سفل الحذاء ، و يقوم برفع يده للأعلى ليخلع نظارة الريبان من على وجهه و لتظهر على الجيب الداخلي للجاكيت عبارة واضحة ( صنع في فرنسا )
المشهد الثالث
أولاد الحارة يلعبون بالشارع أمام البناء الذي يقطن به السيد المسؤول ، و الذي يحاول بدوره الدخول الى منزله بسرعة متجاهلا جاره السمان أبو كفاح الذي خرج من دكانه مسرعا لالقاء التحية على أبو يعرب الا أن المفاجأة كانت حين قام أحد الأولاد برمي الكرة المتسخة بقوة لتتجه مباشرة و تصيب و جه المسؤول أبو يعرب و هنا يبدأ الحوار التالي
أبو يعرب واضعا يده على خصره ليعطي انطباعا لمن يقف و يمر بالشارع بأنه سيسحب مسدسه الأربعطعش و يقوم باطلاق النار صارخا بالأطفال : يا أولاد ال000000 و الله لربي فيكن القرود السود ، و الله لساوي ، و الله لأفعل ، و الله والله ........
يتدخل الجار أبو كفاح و يمسك عن طريق المونة بيد أبو يعرب و يقول له : يا أخي أبو يعرب حصل خير يعني منيح ما هرلك شي سن بسيطة انشا لله بعدين الولد اللي ضرب الطابة بكون ابن المسؤول أبو نضال
تظهر ملامح الهدوء على وجه أبو يعرب و يقوم بمسح الطين الذي لصق على جبهته عندما لطشتها الكرة و يقول :يا رفيق أبو كفاح الله يسامحك ليش ما حكيت دغري كنا ظلمنا الولد على كل أنا بدي اعمل اجتماع للرفاق بالحارة لنتشاور ( نتآمر ) بموضوع أطفال الحارة و نجد حلا ثوريا و جذريا لمشاكلهم
يتابع أبو يعرب و هو يمسك بيد أبو كفاح داخلا الى منزله : كيف العمل يا رفيق أنا أحي بك كفاحك و نضالك في العمل لأنه شكل من اشكال العمل ضد الامبريالية و الاستعمار أتمنى لك النصر و المجد لنضالك العمالي
المشهد الرابع
يدخل أبو يعرب لمنزله و يتجه الى غرفة النوم و ينزع مباشرة ربطة العنق التي كاد أن يختنق منها و يقوم بأخذ بيجامته من على السرير ليلبسها ثم يقوم بترتيب السرير و هو ينمنم بسرور أغنية ماشي حدي لنانسي عجرم
المشهد الخامس
يدخل أبو يعرب المطبخ و يلبس المريول مباشرة و يتجه للمجلى المليئة بالصحون و الكاسات المتسخة و يباشر بالجلي و هو ما زال يغني فرحا ماشي حدي لنانسي عجرم
يفتح باب المنزل و تدخل امرأة تبدو على ملامحها قوة الشخصية و يستنتج من لباسها بأنها ضابطة برتبة نقيب في الشرطة , و يبدأ الحوار التالي
أبو يعرب : حبيبتي أم يعرب أنت جيتي
أم يعرب : كيفك أبو يعرب شو عم تساوي
أبو يعرب : الله يعطيك العافية بعرفك متل العادة تعبانة دوام قبل الظهر و دوام بعد الضهر يعني العمل بالداخلية متعب منشان هيك متل العادة رتبت البيت و عم اجلي الجليات ، بس مرة تانية لما بتعطي الخدامة اجازة حاولي تجيبي وحده بدالها
أم يعرب : و الله عم فكر آخد اجازة لأنو يعرب قرب يجي لها الدنيي
أبو يعرب : شو رأيك حاول احكيلك مع الرفيق وزير الداخلية بركي بيعطيكي اجازة خارجية لتلدي ببريطانيا
أم يعرب : ليش بريطانيا
أبو يعرب : أول شي منشان الجنسية البريطانية , و تاني شي ما تتذكري من شي عشر سنين كان رئيس أمريكا زنجي مسلم يعنو أوباما بشو أحسن من يعرب نشالله بشوف الرفيق يعرب رئيس و زراء بريطانيا و بينشر الفكر القومي بالغرب
أبو يعرب يتابع الجلي و أم يعرب تهز برأسها للأسفل و الأعلى و تتخيل يعرب مسؤول في بريطانيا
أم يعرب : بس الولادة ببريطانيا يمكن تكلف كتير
أبو يعرب : و الله الحق معك بس بدنا ندبر أمورنا ، على كل يمكن تكون اولادة ببلاش
المشهد السادس
أبو يعرب ينهي الجلي مسرعا و يركض الى هاتفه الجوال و يقوم بالبحث عن أحد الأسماء و يبدأ بطلب الرقم ينتظر قليلا ثم يبدأ الحوار التالي
أبو يعرب : أستاذ أحمد بيك الزرابيلي كيفك و شو أخبارك و الله اشتقتلك
الأستاذ أحمد : أهلا بس مين معي
أبو يعرب : لا ولو شو ما عرفتني و لا لأنك صرت عضو مجلس فرع نقابة المحامين بدمشق عم تعمل حالك ما عرفتني
الأستاذ أحمد يصمت قليلا ثم يتابع الكلام : و الله يا ميت أهلين و سهلين بالأستاذ ....... ، شو يا رجل من لما سمعنا أنك صرت بالبرلمان ما عاد حدا شافك
أبو يعرب : و الله يا أستاذ بتعرف مشاكل البلد و هموم المواطن السوري خاصة و العربي عامة من المحيط الى الخليج و القضية الفلسطينية و مشكلة العراق و السودان و اليمن ، يعني اذا ما بتعرف أنا بلجنة العلاقات الخارجية بالبرلمان
الأستاذ أحمد : و الله الحق معك ، على كل و الله نجاحك بانتخابات مجلس الشعب شي ببيض الوش لانو أحد الزملاء اللي منعرفن صار مسؤول ، على كل أنا وقت عرفت انو اسمك كان أول اسم بقائمة الجبهة عرفت انو كان معك الحق تكون أول المدافعين عن الورقة البيضاء الجديدة بانتخابات نقابة المحامين للفرع من حوالي عشر سنين ، على كل شو ما عم تمارس المهنة ؟
أبو يعرب متجاهلا موضوع الورقة البيضاء الجديدة : و الله أحيانا بنزل عالمكتب لمشي شغل الأساتذة و نسق عمل المكتب على كل بدي اسألك شو صار بموضوع التأمين الصحي انشالله قدرتو توقعوا العقد و تتفقوا مع شي شركة تأمين و لا ما زال الخلاف قائما على الخروف السمين
الأستاذ أحمد : انشالله قربت تنحل بس ليش عم تسأل
أبو يعرب : يعني بتعرف بركي بمعيتك بتوقعوا مع شركة الها فرع ببريطانيا منشان ولي العهد يعرب بركي منستفيد من التأمين الصحي ببريطانيا و ما مندفع مصاري للولادة
الأستاذ أحمد متفاجئا : و ليش بريطانيا يا أستاذ .........
أبو يعرب : منشان الجنسية البريطانية
الأستاذ أحمد : شووووووووووووووو
أبو يعرب : يا أحمد بيك ان نضالنا القومي و الأزلي ضد الامبريالية و الصهيونية و الاستعمار يجب أن لا يتوقف عند حدود بلد معين بل يجب أن ينتشر الى بلدان العالم أجمع عن طريق الأجيال القادمة المؤمنة بالقضايا العادلة و بحق الشعوب العربية في أن تعيش بكرامة و أن تقف يدا بيد مع شعوب العالم الثالث و ...... و .........
الأستاذ أحمد مقاطعا : شو منشان كاسك يا و طن
أبو يعرب متجاهلا أيضا و متابعا خطابه : ان سياسة التمييز و الكيل بمكيالين التي تنتهجها الدول الامبريالية ضدنا يجب أن نحاربها و نناضل ضدها لأننا نملك الحق في أن نعيش بكرامة و كبرياء و نحن كذلك , و ......... و ...............
الأستاذ أحمد مقاطعا و محاولا تغيير الموضوع : يعني بفهم من كلامك انك تجوزت
أبو يعرب : اي و الله و الحمد لله
الأستاذ أحمد ممازحا : شو منشان الجلي طمني
هنا يقف أبو يعرب لأن زوجته كانت بقربه و بدأت تظهر عليه ملامح التلبك و بدأ يتأتئ على الهاتف
ثم يجيب أبو يعرب : ثواني أستاذ أحمد لو سمحت
ثم يركض خارج المنزل قائلا لزوجته نسيت مفاتيحي عند السمان أبو كفاح رايح جيبهن و يدخل سيارته و يغلق الأبواب و يتلفت يمينا و شمالا ثم يتابعو الله يا أحمد بيك مرة وحدة بتذكر انو مرتي لمحتلي لنشف الصحن بتعرف شو جاوبتها بشراسة :
ولك شو قصتك انتي ، وين حسك الوطني .. وين شعور المسؤولية ... انعدم عندك الاندفاعوالتقدمية ... بدك ياني قوم اجلي ، ........ انا رح قوم اجلي بس ... ! .. وين بتحطي حالك قدام خولة بنت الازور والنساء المناضلات فيمعارك الحياة .. وين أنتي من خولة يلي خاضت حروب طاحنة من اجل تحريرحبيبيها .... وللا الخنساء ... يلي ضحت بأربع شباب متل الوردةكرمالأخوها كليب ......... انتي بتعرفي انواالليدي دياناكانت تجلي صحونوا لدودي الفايد ... ولمتتذمر مرة واحدة ... بدك اجلي رح اجلي بس .. ! .. شو رح يكتب التاريخ عن الزوجة التي اهملت واجباتها كقائد للاسرة التي تخرج منهابعلك .. طبعا يلي هوو انا ... المرأة المدبر والمسير الرئيسي والاساسي الحقيقيلمركب الحياة بما فيه .. من .. جلي وكنس ومسح وكوي و أعمال اضافية مخصوم منهاساعات التأخر في الاستيقاظ الصباحي ، يا عيب الشووم عليك ... ولك .. !!!!!!!!!!!!!
هنا كالعادة التعن نفس شبكة الجوال و بدأ الزميلان يرددان ألو أستاذ ألو ألو ما عدت سمعتك ألو .....ألو ..... ألو..........و انتهت المكالمة و عاد أبو يعرب للجلي


الخلاصة برأيكم أبو يعرب من أي نوع من الأشخاص المذكورين في الموضوع الأساسي

[عاش بعث العرب]

كه كه كه كه كه كه كه كه كه كه كه
ولك كه كه كه كه كه كه كه كه كه
ولك كمان كه كه كه كه كه كه كه
ام يعرب تعي شوفي هادا المقطوعة عنوا الكهربا شو عم يلتلت
أم يعرب : وينوا مو شايفتوا ، أحكيلوا مع مدير مؤسسة الكهربا بركي بيوصلوا نتر جديد مشان يضوي
يرفع عضو مجلس الشعب المسؤول العربي الكبير الرائع المتوازن الراقي المهذب المتجانس مع الاخرين والمتوازن مع نفسه ويلي بحياتوا ما سب ولا شتم ولا علا صوتوا نيفر نيفر ، في صيف 2020 سماعة الانترفون اللاسلكي شيتوا ، ويأتيه الصوت من الأدنى : حاضر سيدي
أبو يعرب : يا أبني جبتوا لهادا ابن ال ( ........ ) يلي عم يكتب عنا
- نعم سيدي جبنا لابن أبو نضال
- العمى فا عيونك شو دخل ابن أبو نضال
- سيدي مو هو ابن ال( ....... ) ، مو أنت الضهر لما شاط عليك الطابة قلت مين هالابن ال(............. ) ، وعلى كل حال هو أعترف
- بيشو اعترف ولك غبي
- سيدي اعترف انوا صرف المصاري عالملذات سيدي
أبو يعرب يحدث نفسه : وين سمعان هالكلمة انا ....... ، آآآآآآآه ، هاي الكلمة كانت تطلع بالبرنامج الطفرة الخيالي الخلاب ، الشرطة في خدمة الشعب أيام زمان
يعود أبو يعرب من صفنته صارخا
- الهي يعدمني طولك يا غبي يا غبي ، ولك بدك الرفيق أبو نضال ياخد على خاطروا مني
رجعوه لاهلوا فورا واعطوه المورننيك يلي واقفة بالكراج مشان ترضوا خاطروا
وجيبولي من تحت الارض هادا المدعو ( أبو الليل )
يغلق أبو يعرب السماعة .............
البحث ما يزال جاريا عن المطفي أبو الليل ..............
قولتكم بينلقط المجرم أبو الليل ولا لأ ............................ يتبع

[وردة شامية]

والله مافي احلى من الشب المساير
يلي بيجلي وبيطبخ وبيشطف وبيمسح وبيساعد بالولاد وبيساوي تختو على بكرا بس يفيق والراتب المرتب يلي بيشلح ملابسه وبيطويها وبيعلقها مكانها ما بيورها ور شلون ماكان بيفيق الصبح بكير بيغلي القهوة وبيفيق زوجته بلطف لتشربها معو وبيلم طاولة السفرة بعد الأكل بسرعه وبيجلي الجليات وبيطبق الصحون والكاسات محلاتها
واذا كان زنكيل ومعو مصاري ياسلام
واذا كان مثقف ومعو شهادات عالية الله اكبر
واذا كان مسؤول كبير والو نفوذ وكلمته مسموعة ياعيني
واذا كان رومانسي ولطيف وكل يوم بيجيب معو لزوجته باقة ورد او وردة وبيهديها بعيد ميلادها كل سنة اسوارة يا خاتم سوليتير هيك صارت الحياة احلى

[فؤاد أبو حطب]

شو رأيك يا وردة شامية أنو هادا الرومانسي اللي عم تحكي عنه يجيب الأولاد كمان أكيد بتنبسطي

[وردة شامية]

بالتاكيد اذا كان عنده اولاد بالاصل بيكون احسن بس على شرط يكون مسكنهم ببيت لوحدهم او عند امهم

ولما بيشتهي يشوف الاولاد يروح لعندهم

[أحمد الزرابيلي]

و الله عم تحكي جواهر

وأنتي بتعرفي جواهر

هي جارة الأستاذ ثائر بالسبعوتمانين

و السبعوتمانين هيه توسع الستوتمانين

يعني ما في واح أحسن من واح

اذا صار في توسع دمر
و توسع قدسيا
من شو بتشكي الستو تمانين ليكون ألهى توسع

يعني بلا صغره لحنا ساكنين بتوسع المالكي سته كيلو متر شمال شرق
يعني بداريا مشان ما تحسبيها

بس بحب أنزل دائماً على الستوتمانين

ليش يا حزرك

مشان ساعد صديقي بالجلي

صديقي صاحب أكبر مجلى لتنظيف الرؤوس العربية

و عم يفكر يفتح فرع للمقادم

لأنو الروماتيزم هلكوا لأبو أحمد سنسرلي

و قالولوا المقادم دوى لهيك شغله

فقلت لحالي يا أبو فراس

بركي من خليه يطلق مرتوا يلي اكتشفنا أنها رجال بعد الزواز بموضوع الجلي

و منجوزا الفنانه المشهورة شيت التبني جوليا خانم يلي بتتبنى ولد من كل بلد و بتتركلهن حرية اختيار المعتقد و الدين

بتعرفوا ليش أحسنلوا لأبو أحمد نجوزا ياها

لأن الوضع بالبلد عم يخليك تتجوز كبير
و البنت عم تتجوز كبيره

يا حصرتي عليهن هالشباب

و احتمال ما يجيهن ولاد و هنن عم يتجوزا هالعمر

واذا أجاهن و العياذ بالله بيجوز يجيهن ولد متل هاد يلي بالمسلسل عم يطلع برمضان شيت بسام كوسا

فاذا أخد هالمأصوفة الرئبه جوليا على الأقل منضمن يكون عندو ولاد جاهزين
و منضمن كمان تتركلوا معهن حرية التعبير و القرار

يعني بتخيرك بين الجلي و المسح

بين كب الزباله و تعزيل الحمام

بين هون و هنيك

و اذا حسيتها متضايقه

بسيطه شوفها مع كم واحد كانت مقيمه على مبدأ المساكنه بقصد الزواج

واسألهن عن أخلائها و شو بيبسطها

بركي يا أبو أحمد العزابي الله بيستر عليك و بتترك مصلحة التهريب يلي كامشها من حاره لحاره بدون حرم جمركي مشان توسع الستوتمانين

بعدين أنته ليش زعلان

التهريب بعد ما تتجوز حبيبي رح يصير على أبو موزه

بتعرفوا لأبو موزه

هاد أبو موزه أخوه لأبو جنب

ما بتعرفوا يلي صار يضرب على أبو جنب

يعني بكره بدك تهرب المشوار مع رفقاتك تهريب

و الحضن

أيه الحضن مع غير أختنا جوليا كمان تهريب

لك

في شي حرم جمركي بصدر جوليا يا تسلملي

لا

بس اسموا تهريب

مشان هيك أخونا الزمخشري و سيباويه ما كانوا بيعرفوا باللغه منيح
مفكرين التهريب بس على الحدود

بس بتكتشف أنو كل شي عم يصير من وراك هوه تهريب

تهريب أعضاء

مثلن

مشان هيك يا أختنا اليمامه قلت لك صدقت

فأنا على سبيل المثال و بلا مؤاخذه من هالكلمة

عضو

نعم

عضو

هي الكلمه حقيقة سواء كومبيوترياً أو احصائياً

بس فعال

ما منعرف لهلأ فعالية هالعضو

و هاتي لضحكك قالوا عني

نشيط

يبعتلوا حمه هالكومبيوتر شو أجدب

يعني معقول عضو يكون فعال و كسلان

أكيد الفعال نشيط
لكن منين جاب هالفعالية


و حطولي بالكومبيوتر كلمة متميز

بتعرفي أيتها اليمامه صاحبة عيون المها

هاي ما رح ناقش فيها

لأني متأكد منها

[عاش بعث العرب]

شو هالطحن يا أب فراس
فاتحه ئريحتك عالآخر

قريحتك مو شريحتك

كرمالك حطيت الشريحة التانيه بالموبايل يلي ما أملك غيروا

إتصلت بفرعون ليساعدني بالرد عليك
إعتذر

قال شو سيدوا
عم يهرب

لأ حبيبي ! ؟
ما حزرت

عم يهرب سقف المطبخ من عند الجيران
هلأ هوو هيك قلي
كذاب سادق أفيتك بتخمن
بس حسيت أنوا متأمر معك على مبدأ التشاور وليس الإيذاء

أبو فراس
إيذاء مو بزاق

شو قصتك اليوم ما عم يوصل صوتي لعندك

بيني وبينك أنا مطخي صوتي
مطخي يعني موطي بلا معنى
خايف تسمعني نجمة جارتنا
عرفتها مو
أختها لجواهر
جواهر يلي طلع من تمها لعيون المها
مين عيون المها
عفوا قصدي اليمامه
اليمامه مااااااااااا بتحكي
ما بتحكي إلا إذا كانت فهمانه شو بتحكي

قديش برأيك في ناس بتحكي
ولا بتفهم عن شو عم تحكي
أنت عن شو كنت عم تحكي

ها ها
عن جوليا

جوليا حبيبتوا لبراد البيت

براد بيتكن قديش قدوا
نحنا براد بيت نا عتيق كتير
بطل يبرد
مشان هيك الأخت الفاضله جوليا متل المكوك الحايك
عم تفعي
نااااااار
يعين لا تلومها إذا دخلت بشي حضن تهريب

تهريب .. تخريب .. ترهيب
هالعيلة بعمري ما حبيتها

ياااا رب
ياااا رب
يرزقني بكم فرنك مشان بيع وإنقل من الستاوتمانين
إلى توسع الستاوتمانين
موعودين بالتوسع بالخطة الخمسية الجديده

قولتك بيفعلوا الخطة الخمسية الأربعين

يعني أربعين حرامي
وخطة خمسية وحدة

ما بتكفيهن وحياتك
بدهن ميتين خطة
لأنوا خمسة بأربعين ميتين

ميتين متميز ما بيشيلوا حجر ظطو مساهم بالمنتدى

لك صعي
رح بشرك بشاره
يمكن أنتقل من الجلي للطبخ
بتعرف
مو معقول كون عزابي وما أطبخ
والله صارت الحالة بتبكي
مين معوا علبة سلمكي

أأأأأأأأأأأأأأأأأأاااخ يا بلد

حاجة والله وجعوني زرار الكيبورد

بس شوفك
هاي إذا لحقت وشفتك
منبقى منشكي

مع خالص المحبة

يوررر سنسرلي
أبو أحمد العزابي

[لتَّات]

فن تعامل الرجال الشجعان مع النسوان


لاتعطيها ريق حلو بتطمع


ولا تخليها لامها تسمع

كلما طمزت حالها كبها لحالها بترجع

كن رجل والرجل اذا ضرب اوجع

كلمة حلوة اصحك تخليها منك تسمع

ولاتعلمها تسألك وين رايح وايمتى بدك ترجع

متل التماسيح فيها العين بتدمع

وان بلشت نق عميل حالك ماعم تسمع

الدلال للست بيضر مابينفع

حتى لو كنت غلطان عليها بالعالي اطلع

والعصا خلقت من الجنة توكل على الله وتشجع

المرأة اذا ماكان الكف عالخد عم يرقع

حتى بمشيتها بتصير تتشخلع

مو غرور منك لاسمح الله لكنك قوام عليها وغيرهيك معها مابينفع

ولانو لوجاز السجود لغير الله كان المرأة لجوزها لازم تركع

وكاس الضرة كاس مره خليها اليوم قبل بكرى تتجرع

لانو مابيذل النسوان متل النسوان هيك بتوقع

طيعني طقها جازي و بحياتك تمتع
قبل ما الراس يشيب او تصير اصلع

حتى الختيار بتموت عليه النسوان وبتقول ماحالو شي بينفع

الحياة ياصاحبي مو شو انت قلت شو من الناس لازم تسمع

وان ما عجبها هيك مافي اهون من انك تخلع

ردها لديرة اهلها والمتأخر الها ادفع

خليها من دسايس امها تشبع

يلا روح حاجتك لانو مرتي قربت ترجع

ولازم اجلي الجليات واطبخ الطبخة قبل ما بوشي تزأع

يالله بشوف وشك بخير صار لازم لمرتي أتبضع

[فرعون]

شووووو هاااد
الله حيوااا
والله الأستاذ لتات طلع حكيم
حكيم من الحكمة مو الحكيم يلي بيعطنا إبره ديكلون
تحياتي أستاذ لتات
إلنا زمن ما شفنا هالإبداع
من أيام هتي برتي
شكرا للمشاركة الظريفة
يعني هيك حركولنا المنتدى
خلوا الحلوين يجنوا....
جنوا ... جنوا ... يا عيوني
شو بحبكن أنتوا ومجنونين
أحم أحم ......
معلش هلئ فايت من النوم ...
فايت من النوم ...
عفوا قصدي فايق من النوم .......
بعدي شوي برجع بفوت عالمنتدى
تشاااو

[لتَّات]

مشان الله ما تواغذوني
اول باشتان كنت مألع وموجهلي انذار
منين الواح بدو يلائيا
انذار من المنتدى وانذار من البلدية وانذار من الكهربا بأطع ساعة الكوران وانذار من المي وخليها لله
وتاني باشتان الواحد ما عمبيلحأ يساوي شي هالأيام
الله وكيلك بفز من جهجهة الضو على دء باب صئاء الزبال بدو زبالة ويلي في النصيب
ما بلحئ ساويلي كاسة شاي اكرك عجم لأنو الئهوة غالية الا بتكون فائت مرتي منكوش شعرا وعيونا معمصة ويا ويلي وياسواد ليلي اذا لئيت ارض ديار مو مشطوفة
هية مو منشان شي حرام بس لانو المي بتنأطع عنا الساعة تمانة الصبح وبتجي خمسة الصبح فدوبي أجلي وأشطف وأغسل بهل التلت ساعات
بركد بزيح شئف زريعة وبرفع شحاطتي وشحاطات الولاد من الأرض وبدندلك البربيش وعلى رش
بركد بدي لحئ الشطف
وإذ بسمعلك صوت بأبئة المي بالركوة بترك المي مفتوحة وبركد للئم الدولة ولا يسمعلك سريخ مرتي من جوا ما خلصت شطف حتنأطع المي خف إيدك شوي بلا ترويئتك هلأ
برجع للشطف مكسور الخاطر بتكون المي بلشت تخف بئوم بعي صطولة المي وبكتها بالطاصة تحت الئواطع والكنابايات وبئشط الميات بالئشاطة
فائوا لولاد يلي بدو ببرينتو ويلي بدك تعرض عليه والببو بدك تغيرلو ويلي بيركب عالمكسليتة وبيبلش يجئجئ ويلي بيمشي حافي وبيفشخ فوئ المي بجعزة وبيتفشكل وبيوئع وعة أتولية بتفوت أئجازة بئيدو بيصير بيجعر وبيبعر وأأأأأخ يا أمي حبيب أمو ريتو يئبر أمو
ما بلاقيلك إلا أمو جاية وبإيدها المئلاية والكفكير
يا حفيظ
الله وكيلك من زورة وحدة ما بعود بفتح تمي وبكمش المئشة وبكمل شطف كأني مو سمعان وما دخلني
كتر خيرا بتاخد هاصغير وبتجبلو شرطوطة وبتخسلا بالمي وبتعصرا منيح وبتحطلو شوية بن وبترطلو ياها وبتئلو ئوم ويعلى أمك شو نعيان كنك أبوك ناتع هالطول عالفاضي مع أنو ابن تئصيرة وزمك مو طويل
أوم من وشي هزيتلي بدني أنت وأبوك عالصبح
بعد ما خليص شطف لازم امسح الدرابزين ونشف البرطوشة وكلو بلا صوت يعني إذا طلع صوت واحد بتصرخ فيني مرتي حاجة تطرطئ شرشحتنا ئدام الجيران
وبعدين دوبي حط فطور ولبس لولاد ووصل كل واحد منون عمدرستو وروح عاشغلي وهون بئا بتبلش ئصة جديدة وحدث ولاحرج
بالمكتب يادوب افتح هلنت وبصفن لبين ما يجي الخط ويفتح الموقع وأحيانا بكون نعسان بكمل نومتي لبين ما تفتح الصفحة
ببحبشلي على شي موضوع من نوع المواضيع يلي بتهمني ئليل للائي لأنو خافف اللت بالمنتدى وصاير كتير جدي وملتزم الله يحميكون
وليييييي تأخرت على مرتي طلبت مني عدس وعجين مشان اطبخلا حرائبأصبعو
سلامات

[المحامي علي عبد الرحيم]

الاخ لتات
سمعت كتير عن الحراءباصبعو ولم اعرفه فلو تكرمت لمحه عن هذه الطبخه

[لتَّات]

معزوم عندي اخي علي على احلى اكلة حرائباصبعو ايمتى مابدك لعيونك اكلة ما بتنساها بتاكل اصابيعك وراها
هلأ ئبل كل شي هية اكلة بحسها نسوانية يعني النساوين بيحبوها اكتر من الرجال وما بيطبخوها الا اذا هنة اشتهوها اما اذا الرجال اشتهاها بينطفو ئلبو ليساووها لانو شغلها صعب الصراحة ومو طيبة الا بالكترة يعني بدا ناس كتير غالبا بيصير عليها عزايم وغالبا بتكون العزايم عزايم نسوان متل مائلتلك
هية اكلة عجين وعدس وكزبرة وتوم وحمض تمر هندي وبصل وئرائيش عجين هي هية المكونات وصحتين وعافية
اهل اول كانو يعجنو العجين ويساووها بالعجين وبتطلع كتير طيبةوانا هيك بحبها بس زمان اول تحول لانو نسوان هالايام تنابل بدون الشغلة جاهزة مئشرة وما بيطلع بايدون يساوو عجين ويعجنو فبيساووها بالمعكرونة او عجينة جاهزة من الفرن
الطريئة
بتسلئ العدس وبتحطلو بصلة وحمض دبس برمان في ناس بيحطو حمض ليمون او نارنج بس موطيب اطيب شي بعصير التمر هندي هيك اصلو
بهالاثناء بتعجن العجينة وبترئها وبتلفها مبرومة وبتئطعها معينات او مربعات صغيرة
بس يستوي العدس ئبل ما يستوي بشوي يعني بس يلوح شوي بتسئط العجينة منشان تغب طعمة التوم والكزبرة والحمض
وبتتركون عالنار شوي
بس يستوو بتصبهم بالجاطات الكبيرة وبتتركهون ليبردوا وبتجمد المرئة شوي
للزينة بيحطو عجينة محمصة بياخدو شئفة من العجينة وبيئطعوها دواير صغيرة وبيئلوها وبيحمصوها لتصير مئرمشة حماتي بتئطعها بالكشتبان ئراميش
وبيحطوها على وش الجاط مع الكزبرة والتوم المدئوء والبصل مفروم جوانح مو ناعم كمان مقلي ومحمص بينئلا بالزيت النباتي والبلدي سوا يعني بتخلطهم بيعطي نكهة بتزحل الئعل
هي طريئتي بس الصراحة طريئة ستي وحماتي اظرف بيطلع معهون اظرف ما بعرف ليش
اذا بدك بسألك ياهون
وايمتى ما بدك بتحضر بيحضر واجبك واحلى حرائباصبعو لعيون الشباب

[أحمد الزرابيلي]

قلبي حاسسني أنو الجلي بدو ينفقد من السوق

ما في شي عن ناكلوا بدو جلي

يعني الجلي بيكون بعد أكلة زفرة

برغل بفول مثلن

مجدرة

هاد أزفر شي مناكلوا

بس طلع شي أزفر منن كلن و ما بدو جلي

و شهيتنا مفتوحه عليه كتير

مو بكيفنا

و هذا اعتقد يحسب للحكومة

لأنها وفرت علينا ثمن المنظفات و سائل الجلي

فأكل الهوى لا يحتاج الى جلي من بعده

كول و أمشي

[مازن ابراهيم]

اقتباس: فأكل الهوى لا يحتاج الى جلي من بعده كول و أمشي

كما بإمكانك أن تأكله على الماشي
وفي وكل مراجعة لموظف
وكل ما تفكر تعبي مازوت
وكل ما بدك تشتري خبز
أيهههههههههه شي بجنن

[المحامي محمد جسري]

يا ترى ما الدافع وراء المداخلات التي اقلها 50 سطر ؟
هل هي المعاناة ؟
هل هو الألم ؟
يا إلهي !
شوي تانية منشوف القصائد والقوافي بدأت بالانتظام...
انها المعاناة.. آه .. ليت شعري..
قلبي معكم ايها الغير عزابين
وتذكروا دائماً انه:
إذا كان اقرب طريق لقلب الرجل هو معدته فإن أقرب طريق لقلب الزوجة هو جلي الصحون.

[المحامي نوار الغنوم]

أنا بس بدي اسأل
أحمد بك من أنو نوع من الأزواج المذكورين

[أحمد الزرابيلي]

و الله يا نوار بيك أنا من الناس الذين يعرفون واجباتهم

و لا أجعل زوجتي تحتاج لأ ن تكلمني أي كلمة

فبمجرد دخولي الى المنزل أشمر عن أكمامي و أبدأ بالجلي

غريبين هؤلاء الرجال الذين يسمحون لزوجاتهم بتأنيبهم


فتقسيم العمل بين الزوجين هو سر الحياة الزوجية

أنت تعمل خارج المنزل

و أنت تعمل داخل المنزل

و هي تستمتع بما تفعله

حينها تكون زوجاً مثالياً


مثلي

[المحامي محمد جسري]

لو عرف ( بتاح حتب ) شو الطرنيب هالايام
لأعاد النظر فيما قال أو ع الاقل كان وصّا الزوجة بكلمتين بيجبروا خاطرنا !
=============================================

تضم النصوص المصرية القديمة تعاليم في الحكمة من بتاح حتب ، ترجع إلى حوالي عام 2400 ق.م،
تقدم النصيحة التالية إلى الرجال:
"إذا كنت رجلا ذي شأن فأسس لنفسك أسرة وأحب زوجتك في المنزل كما يجب، وأشبعها وإكسها وإستر عليها وكن بلسما يداوي ويريح أطرافها، وأدخل السعادة إلى قلبها بطول حياتها؛ فهي حقل طيب لسيدها"