أيها المحامون كل عام وانتم بخير

[المحامي سامر غسان عباس]

أيها المحامون كل عام وانتم بخير
أنا ما بعرف إذا كان في عيد للمحامين , لكن كل سنة وبمثل هذا اليوم بعيد كل الزملاء ب 1 نيسان , ومع انو كل العالم بتكذب لكن المحامي متهم أكتر من غيره بالكذب .....يعني مثلا :
بتسأل واحد كيفك ؟ بيقلك منيح مع انو ما بيكون في شي بحياتو كلها منيح
الطبيب غالبا بيخبي عالمريض حقيقة مرضوا اما ( بيزيد وبيكبر الوهم ) لغاية مادية أو بيخفف عليه منشان ما يصدموا بالبلاوي اللي عنده .
سمّان الحارة بيحلفلك مية يمين أنو ه ( اللّبنات ) تازا والخيار بلدي والبندورة بلدية , مع انو اللبن بيكون محمض والخيار بلاستيكي والبندورة اردنية .
بتروح لتشتري ( قميص ) بتسمع بالانبياء كلها والبياع عم يحلف ويكتر أنو سعروا بالجملة ألف وخمسمية وانو مو ربحان منك إلا ( مية ليرة ) استفتاحية أو بيقلك ( أستاذ هاد لإلك بألف وستمية ورئة ) مع انو هي ال (إلك ) ما بتعرف من وين جابها لأنو لا بيعرفك ولا بتعرفوا ومع ذلك الزلمي ( حبك ) من اول نظرة وبدوا يكارمك وما يربح منك كتير ...
الميكانسيان بيحطلك قطع مقلدة لسيارتك و بيحلف انو يابانية وبيحاسبك براس الاسعار وبيحلف انو مكارمك وأنو هاد السعر بس ( لإلك ).
حتى بواب البناية إذا بعتوا يجبلك غرض حقوا مية ليرة ما بيرجعلك شي من الالف اللي عطيتوا ياها ؟ وبيخترعلك قصة متل :
(رجت عند أبو معتز قلي ما في منها هي الشغلة إلا بالبرامكة حملت حالي ورحت لهنيك وفتلت محل محل ما شفتها , دلّوني على واحد بيقلولو ( ابوعمر العربيني ) رحت لعندو على عربين طلع مسكر . قال راح يصلي الضهر بالجامع , نطرتوا حتى رجع , قام بعتني لعند واحد بحرستا اسموا ( ابو خليل الدوماني ) وهذا بعتني لعند ( أبو العبد سكرية ) قام ابو العبد بعتني على محل بالقنوات (حد هاد اللي بيبيع بوابير عتيقة ) اسموا ابو صبحي المالح وهنبك لاقيت طلبي بس شو كلوا على طلع بتكسي ونزل بتكسي هييييييييك لحتى لاقيتها .)
واخرتها ياجماعة بيقولولك المحامي ( شغلتوا الكذب ) ما شي بيجنن ؟؟
الله يرحموا ل ( محمد الماغوط ) لما عمل عيد للكذب
على كل السمعة طالعة طالعة وبصطفلوا يحكوا متل ما بدهون , انا محامي وبفتخر وبكرا بدي عيد لانو بيطلعلنا يوم نعيد فيه لهبك كل عام انتو بخير

[المحامي باسل]

اي كل عام ونحنا بخير لكن !!