حكاية من حكايا الحكواتي

[الحكواتــي]

قال الحكواتي ياسادة ياكرام :
مرة بغابر الأزمان اضطرينا لمراجعة أحد الأقسام لشكوى ضد شخص اطلق النار في الهواء لترهيبنا ، وبالفعل استقبلنا السادة الشرطة على دفا الصوبيا وريحة / ..... / الفايحة ... العفو لأنهم كانو شالحين من رجليهم .. وبعد القيل والقال وليش وشلون وأخد وعطا أبو ساعتين ونص يعني بيكون الجاني صار بشيكاغو شدو الهمة وهي بادر ة طيبة بتنحسب الهن ...
وقالو يلا خدنا لعنوانو .. وبالفعل شمرت وأخدتهن وسألو الجيران وبلا طول سيرة ونحنا وعن نسأل لقينا المنظوم قريب منا ودليت الشرطة عليه ، على أمل يمسكوه وكان عددهن تلاتة .. المهم وكمان بلا طول سيرة ركدو وراه وهو يركد وهنن يركدو وهو يركد لحتى انخلع كعب بوط أحد عناصر الشرطة .. لأنو وقتها كان دارج السابو وطبعا وقف الشرطي ولقط الكعب من الأرض وبلش عملية الاصلاح الكعبي ... وضلو التنين التانيات راكدين وراه .. وبلا طول سيرة سلت مسدس الشرطي التاني لأنو كان مشنكلو بخصرو متل سلفستر ستالوني بأيام شبابوا وطبعا نزل التاني وأخد المسدس من الأرض وبلش تنضيف ( عملية تنضيف ) وطبعا ضل الشرطي المناضل الأخير راكد وراه ومالح الكم شو سلت من الشرطي الأخير ولح اتركها لذكائكم بس على هوا ما سمعت بعدين أنو عالسرعة كان نسيان يلبس القشاط تبعو .. وبلا طول سيرة كان ( أحمر على حد علمي و ذاكرتي ) المهم نفد الجاني وضلينا نحنا عم نستمتع بكعب ومسدس و ( الأحمر ؟؟؟ ) تبع الشرطة ولحد هلأ في نشرة باسم الهربان والقصة ما صرلها زمان يمكن عشرة أو 11 سنة ... فما رأيكم
وفي الختام سلام

[أسعد المدرس]

شكرا جزيلاً على القصة يا حكواتي المنتدى ... على فكرة انا بهنيك على أسلوب الطرح المميز الذي تتملكه وحس الدعابة الذي جعلني أضحك من صميم قلبي ...
والبحث ما زال جار على مستمع الى حكواتي اليوم ...

أخي أسعد صحيح أنو الحكواتي أنقرض أو شبه أنقرض بس حكاياتو أبدا ما بتنقرض وبكل أنسان في مئات الحكايا منها اللي بيضحك ومنها اللي ببكي ومنها اللي ببكي من الضحك ...