العمى ضربك ما أغلظك

[لتَّات]

سيداتي انساتي مدمزيلاتي
سادتي المحامين
الادارة الكريمة
كل مين بيدخل عالمنتدى هالايام بيديئ خلئو من كتير الحكي بالسياسة والنقد والاصلاح ومابعرف شو
ملينا والله ملينا وداء خلئنا وشي مو جايب همو ولا نتيجة عوجا عوجا
يعني نحنا مو مكفينا الجزيرة والعربية والحرة والسي ان ان واليورونيوز وفرانس وغيرا وغيراتا
والله شي بيعل الئلب
لأ وشو خيو الكل بيحط الحئ عالدولة وكانوا يعني نحنا كامل الاوصاف فتلني وما في منا وملايكة ومنستاهل احسن من هيك
لذلك شو ئلت لحالي
ليش ياولد ما منفتح هيك موضوع ظريف لطيف ننتقد في حالنا بطريئة لطيفة وظريفة ما تدايئ حدا ولا تخرب بيتنا ولا تنيمنا ببيت خالتنا والله مالنا لئيانين الكف والله وكيلكم ماخدا حيعتذر منا
مو حرية الزلمة بتخلوص عند حرية بائي الزلم
تعو ننتقد نقد بناء
نأشر فيه باصبعتنا على تصرف سيء او مسيء بحياتنا اليومية بالمنتدى بالبيت بالشغل بالقهوة بالشارع بالمكرو
خلينا نحط حياتنا تحت المجهر ونشوف حالنا منستاهل احسن
الفكرة انو نئدم كل يوم جائزة اسمها العمى ضربك ما أغلظك لكل واحد بيتصرف تصرف مشين مزعج مسيء خاطئ بركي منحس على دمنا ومنحسن حالنا ومنترك كل هالظواهر السلبية
ياريت هالفكرة تلاقي قبول
وبترجى الادارة توافقلنا عالموضوع لانه والله بريء وظريف وتسمحلنا نحكي فيه وبلهجة كل واحد فينا يعني ما بدنا فصحى الفصحنة هون ما بيمشي حالا
اذا عجبتكم الفكرة شاركوني فيها واحكوا على كل شي غليظ وخطأ بحياتنا
الفكرة منئولة ومو فكرتي بس ظريفة ومفيدة
وكتر الله خيركم
ولاتواخذونا
اخوكم لتات

[لتَّات]

وهي انا رح بلش من عندي اول هدية

بهدي جائزة العمى ضربك ما أغلظك لليوم لكل واحد بيصف سيارتو محل سيارتين وبيتركها بعيدة عن الرصيف متر ومايلة وكأنو هو مو سائل كل يوم بيقدر يجيب سيارة جديدة ماشاء الله، واذا حدا نكشا بيعمل مهرجان، ولما بيشوفك عمتدور عمحل لتصف سيارتك بيعمل حالو مو هون وبدير وجهه للناحية التانية وحاسس بنشوة تعذيب الغير. اي العمى ضربك ما أغلظك من بين المواطنين أصحاب السيارات
وبهديها كمان لكل واحد وائف عالاشارة ومسكر اليمين والعالم متل الدواب وراه عمتزمرلو وهوة مطنش عامل حالو مو سمعان وبعدين قال بينزعج من الزمامير وبيتنحنح شوي شوي بيسارتو مخترة وبيقدم لئدام وبيصير يسب ويخانئ كل مين زمرلو