هيك صار

[المحامي سامر غسان عباس]

أروي لكم ثلاثة حوادث وقعت , فهي إذا واقعية على قولة ( زياد الرحباني ) :
الحادثة الأولى :
مما رواه لي أحد الأساتذة المحامين الكبار ولم تتسن لي فرصة كتابته حتى تاريخه مايلي : قال :
(سمعت يوما احد الزملاء الأغبياء يقول لموكله على مسمع مجموعة من الناس في إحدى ممرات العدلية الجانبية : ( والله أنك أبخل من الجاحظ ).
بعد أن ذهب الموكل و اجتمعت مع الزميل في المكان الذي ( يحتسي) فيه المحامون القهوة والشاي ضمن المحكمة و قلت له بوضوح وعامية :
- ( ولك يا زلمي شو بك كنت ماسك الموكل وعمتحكيه عن الأتعاب بها للهجة قدام العالم .....عكل الشغلة ما شغلتي بس بحب فهمك انو الجاحظ ماكان بخيل )
- ( لأ ياسيدي كان بخيل و براهنك من مية ألف لمية ألف )
- ( يا بني أدم الجاحظ ما كان بخيل )
- ( براهنك انو الجاحظ كان ابخل واحد بالعرب متل ما كان حاتم الطائي أكرم واحد )
- ( عكل أنا ما رح راهنك لسببين الأول : أنو المصاري اللي رح أخدا منك حرام لأنك خسران مية بالمية وأنا بعرف هالشي وما رح استغلّك , وتانيا لأني بعرفك أنت بالذات شخص بخيل وبظن أنك أنت أبخل العرب وغير العرب فاكيد ما رح تدفع .)
- احتد الزميل وما هدي لتاني يوم وبعد ما فهموه الزملاء الشي اللي شرحتوا أنو الجاحظ هو كاتب كتاب : (البخلاء ) وهذا لا يعني بالضرورة انو الجاحظ كان بخيل ...
هذه واحدة من الحوادث .
الحادثة الثانية :
حدثت معي شخصيا :
السنة الماضية وبانتخابات مجلس فرع النقابة تقدم مني أحد ال( متمحمحين ) الذين كانو يعملون لدي في مكتبي القديم في الذي كان ملاصقا لمبنى القصر العدلي باللاذقية , و كان لي قرابة العام لم اره بسبب أسفاري الكثيرة طيلة العام 2009 , و جرى بيننا مايلي :
- أستاذ سامر اخيرا شفتك .
- أهلا استاذ (ف) .
- خبرني عنك ليش ما عم نشوفك بالمحكمة ؟ شو ما عم تشتغل بالمهنة ؟
- والله ليك قصة انك ما عمتشوفني بالمحكمة ما بيعني اني ما عمبشتغل بالمهنة الموضوع اني عندي شغل برات البلد وبالمحاماة , أما دعاواي بالبلد فانت بتعرف انو شغلي الرئيسي ما بعدلية اللاذقية , لأنو بسلامة فهمك في خمس محاكم وثلاث عدليات بمناطق اللاذقية.
- يعني وضعك المادي منيح .
- كتّر خير الله.
- يعني بفهم من حكيك أنو صار معك تدفع ديونك .
هنا تفاجئت من كلام (ف ) وقلت :
- خير استاذ (ف) في حدن إلو عندي مصاري وأنا نسيان أو غفلان وإجا عميشتكيلك شي لا سمح الله ! ؟
- لأ ما هيك القصة بس اللي بياخد لازم يرجع ..
- ولك يا (ف ) فهمني شو الموضوع ؟
- ها ها....... بتتذكر لما كنت أشتغل معك بالمكتب اللي كان جنب المحكمة , لما إجا الشخص اللي بيدفع فواتير المكتب ( كهربا وهاتف ومي ) وكان إلو معك خمسة آلاف ليرة و اخدت مني ألف ليرة لأنو ما كان معك وقتا إلا أربعة , وهالحكي كان تقريبا بالشهر السابع 2008؟
- أولا أنت ما كنت تشتغل معي أنت كنت تشتغل عندي , تانيا : أنت بتعرف انو سفراتي كتيرة وأنو هيك شغلة من النوع اللي ممكن ينسى بسرعة وكان لازم تذكرني فورا لأني فعلا نسيت , ثالثا ولك يا بني ادم هلق نحنا بأواخر الألفين وتسعة وصرلك كاتم بقلبك كل هالوقت , طيب حكيني ورابعا بعد كل هالمدة أنا فكرت عمتسأل عني وعن أحوالي بصفة زمالة وأتاريك معصب ومزعوج منشان هالمبلغ التافه طيب قلي بدك ألف ليرة وبلا كل هال (عي ) .
- بس أنت ما حدا فينو يلقطك , الله يرزقك يمكن أنت ما بتأثر عليك الألف ليرة بس علي بتأثر .
- لا والله يا أفندي الألف بتأثر حتى علي, بس طيب حضرتك كنت تشتغل بالمكتب وكان فيك تاخدا... وفيك تضيفها عأتعابك اللي كنت تاخدا مني أو من زبائن المكتب حتى بلا ما تقلي متل ما كنت اعرف .
- أي صحيح بس أنا مو بس منشان هيك مزعوج ؟
- خير انشالله لسا في آلف ضايعة هون ولا هون
- لأ ... بس زعلان لأنك ( كعرتني برات المكتب من هديك السنة ) بتتذكر لما إجا لعندك الموكل الفلاني وقلتلي لحتى أنتظرك برا متل (ال ...... )
- ولك يا بني ادم هذا الرجل كان موكل و فيه حديث خاص بيتطلب سرية بين المحامي والموكل ووجودك كان بلا لازمة وانت من اهل المكتب يعني لازم تفهم لحالك ,
- لأ أنا بشتغل معك ومن حقي اسمع .
- ولك يا بني أدم الحادثة من أكتر من سنة وبرجع بقلك انت كنت تشتغل عندي مو معي وحتى ولو , فمن حق الموكل السرية لأنو قاصدني لألي وانا اللي اسمي مكتوب عباب المكتب مو أنت .

الحاصـــــــــــــــل وبلا طول سيرة أني كتير عصبت من المسيو بس حاولت امسك أعصابي قدر الإمكان و( ذلك لم يكن بالأمر اليسير ) واخيرا أنتظرت حوالي الساعة بعد ما وو قفت ببهو المركز الثقافي باللاذقية حيث كانت تجري الانتخابات حتى كان المحامي (ف ) مع مجموعة من الزميلات والزملاء فتقدمت وقلت له بلهجة شديدة الهدوء :
تفضل استاذ ( ف ) يا ريت تخبر الأساتذة كيف كنت عم تشتغل معي بالمكتب وكيف أنا ( تصرفت وكعرتك برات المكتب وكيف اكلت عليك الف ليرة ثم امسكت بألف ليرة من جيب قميصي ووضعتها على نظاراته ثم امسكت الإثنين معا وكانتا كالعجينة ووضعتهما في جيبه وقلت له هذه الألف ليرة التي لك معي ويبقى لك معنا الف ليرة أجرة تصليح النظارة نعطيك أياها في السنة القادمة .

الأساتذة القراء الكرام :
والله ما أوردت هاتين الحادثتين ابتغاء تسلية أو استشفاء من زميلين في المهنة , لكني أوردتهما كبعض من كل , مما يحدث معنا يوميا من أشياء ربما لا تحدث في بقية المهن ؟
ما لمسته عند كثيرين من ممارسي المهنة من ( حسد وغيرة , و نميمة , و قفز فوق الأسطحة , و القيل والقال ) جعلني بصراحة وارجو ان لا تزعلوا مني :
جعلني أقرف عندما يناديني بعضهم : أستاذ سامر , فليس المهم هذا اللقب فقد أصبحنا ندقق من هو الذي يطلق عليك هذا اللقب وهل هو من باب السخرية أو تمشاية الحال أم فعلا يقصد به الاحترام والتقدير .

زد على ذلك الحادثة الثالثة:
لا أعلم إن كنتم تعرفون ببعضها وخلاصتها اني تجولت يوم الأحد على مجموعة من البنوك الخاصة , وطبعا كلهم استقبلوني بالابتسامة العريضة لما علموا بغرضي إيداع مبلغ مالي , لكن عندما سالتهم ومن باب الاستفهام لا أكثر عن القروض التي يمنحونها , هنا هل تعلمون ماذا كان جوابهم كلهم ؟
(( أسفون هناك تعميم وعرف عام بين المصارف , بعدم التعامل بالقروض مع المحامين ورجال الدين ))
هنا كنت دائما وفي كل بنك أدخله وبعد سماعي لهذه العبارة كنت أقول لهم :
والله لن أضع أموال في بنك لا يمكنني الإستفادة من كافة خدماته لذلك لن اودع لديكم ولن أخذ منكم وتبقى بنوك الدولة احسنلي أنا وبقية المحامين , الحق مو عليكون الحق عاللي خلّاكون تفتحوا بالبلد وعاللي إجا لعندكون والسلام ) .
من لا يصدق من القراء ليذهب بنفسه , ومن لديه أسماء بنوك تقبل التعامل قرضيا ً مع محامي فليدلنا عليها جزاه الله قرضا بفائدة ميسرة حتى يوم الحساب .
ودمتم
SAM :4:30PM
19/1/2010

[عاش بعث العرب]

أستاذ سامر المحترم
رغم تأكيدك على أن ايرادك للحادثة ليس من باب التفكه أو التسلية ، إلا أنني لم أتمالك نفسي من الضحك عند قراءة ما كتبته ، اولا لبداعة الاسلوب السردي اللطيف وثانيا لسخرية الموقفين بحد ذاتهما ، وكما يقال شر البلية ما يضحك
أشكرك ولديَّ توضيح للسادة القراء وسؤال خاص لك أستحلفك بالله أن تجيب عليه بدون تذمر
التوضيح وعلى مبدأ ضيعة ضايعة ؟ ، كلمة ( كعرتوا ) تعني (طردته ) وهذا فقط حتى لا تفهم بغير معنى !!!!!!!!!!!
أما السؤال : ( فيكي تقلي ليش كنت مطنش عالالف ليرة تبع الزلمة ) ؟؟؟؟؟؟؟؟؟؟؟؟؟

لك مني كل التحية